24.09.2021

Ўзбекистон Республикаси Президентининг 2021 йил 17 август ПФ-6279-сонли Фармони эълон қилинди. Унга кўра аҳоли турмуш даражасини оширишга қаратилган чора-тадбирлар кўламини кенгайтириш, коронавирус пандемияси даврида фуқароларни ижтимоий ҳимоя қилиш ва эҳтиёжманд оилаларни моддий қўллаб-қувватлашни янада кучайтириш, уларнинг даромадларини изчил ошириб бориш мақсадида:

           1. 2021 йилнинг 1 сентябридан бошлаб бюджет ташкилотлари ходимларининг иш ҳақи, пенсиялар, стипендиялар ва нафақалар миқдори 1,1 баробарга оширилди.

2. 2021 йилнинг 1 сентябридан бошлаб Ўзбекистон Республикаси ҳудудида:

меҳнатга ҳақ тўлашнинг энг кам миқдори — ойига 822 000 сўм;

базавий ҳисоблаш миқдори — ойига 270 000 сўм;

пенсияни ҳисоблашнинг базавий миқдори — ойига 289 000 сўм;

ёшга доир энг кам пенсиялар — ойига 565 000 сўм;

болаликдан ногиронлиги бўлган шахсларга бериладиган нафақа — ойига 622 000 сўм;

зарур иш стажига эга бўлмаган кекса ёшдаги ва меҳнатга лаёқатсиз фуқароларга бериладиган нафақа — ойига 440 000 сўм;

иш стажи тўлиқ бўлмаган чоғдаги пенсияларнинг энг кам миқдори қўшимча тўловни ҳисобга олган ҳолда — ойига 440 000 сўм;

белгиланган ёшга доир энг кам пенсия миқдоридан 623 000 сўмгача пенсия олувчиларнинг ёшга доир ва ногиронлик бўйича пенсиялари миқдори — ойига 623 000 сўм;

1941 — 1945 йиллардаги уруш ногиронлари ва қатнашчилари, шунингдек, фашистлар концлагерларининг вояга етмаган собиқ маҳбуслари ва Ленинград шаҳри қамал қилинган даврда ишлаган шахсларнинг энг кам пенсия миқдори устамаларни инобатга олган ҳолда — ойига            2 750 000 сўм этиб белгиланди;

боқувчисини йўқотганлик пенсияси олувчиларнинг бир нафар меҳнатга қобилиятсиз оила аъзоси учун пенсиянинг энг кам миқдори — ойига 440 000 сўм этиб белгилансин ва кейинги ҳар бир меҳнатга қобилиятсиз оила аъзоси учун амалдаги тартибга мувофиқ пенсия тўланиши белгиланди;

боқувчисини йўқотганлик нафақаси олувчиларнинг бир нафар меҳнатга қобилиятсиз оила аъзоси учун нафақа миқдори — ойига 440 000 сўм ва кейинги ҳар бир меҳнатга қобилиятсиз оила аъзоси учун 165 000 сўмдан қўшилиши белгиланди.

Бюджетдан ташқари Пенсия жамғармаси Тупроққалъа туманида ушбу фармон ижросини таъминлаш бўйича чора-тадбирлар белгиланиб, бўлимдан пенсия ва нафақа олувчи 5885 нафар фуқароларнинг пенсия ва нафақалари ўз муддатида қайта ҳисоблаш ишлари олиб борилди ва 2021 йил 6 сентябр куни банк пластик картаси пенсия ва нафақа орқали олувчи 1479 нафар фуқароларга 1,32 млн сўм маблағ тўлаб берилди ҳамда нақд пулда пенсия ва нафақа олувчи 4216 нафар фуқароларнинг 3,54 млн сўмлик тўлоқ қайдномалари сайёр кассалар орқали тарқатиш учун Халқбанки Питнак шаҳар филиалига тақдим қилинди. 2021 йил       24 сентябр холатига туманнинг барча пенсионерларига пенсия ва нафақалар тўлиқ яшаш манзилларига етказилиши таъминланди.

Бюджетдан ташқари Пенсия жамғармаси
Тупроққалъа бўлим бошлиғи:                                                 Б.Маткаримов