08.03.2023

Muhtarama onaxonlar! Hurmatli opa-singillar! Munis va lobar qizlarim!

  Ona tabiat chiroy ochib, atrof-muhit yashil libosga burkanib, bahor nashidasi tobora kuchayib borayotgan ayni shu fusunkor ayyomda siz, azizlarimni, sizlarning timsolingizda butun tumanimiz ayollarini 8-mart – Xalqaro xotin-qizlar kuni bilan chin qalbimdan samimiy muborakbod etaman.

Bu dunyoda shirin va ahil, baxtli hayot uchun poydevor yaratib, insonni inson, oilani mustahkam oila qiladigan, biz uchun sevgi-muhabbat, vafo va sadoqat timsoli bo‘lib kelayotgan siz, go‘zal va betakror, qadrdon ayollarimiz, desak, ayni haqiqatni aytgan bo‘lamiz. 

Respublikada ayollarning ijtimoiy-siyosiy faolligini kuchaytirish, qonuniy manfaatlarini himoyalash, qobiliyat va salohiyatini ro‘yobga chiqarish, oila institutini mustahkamlash, onalik va bolalikni himoya qilishga qaratilgan ko‘plab chora-tadbirlar olib borilmoqda.

Xususan, tumanimizda o‘tgan davr davomida og‘ir turmush sharoitida yashayotgan xotin-qizlarning 491 nafariga tibbiy, 1549 nafariga moddiy, 2794 nafariga bandlik masalasida yordamlar ko‘rsatildi. 77 nafar uy-joyga muhtoj xotin-qizlar uy-joy bilan taʼminlandi.

Tumanimizning dilbar, fidoyi va mehribon xotin-qizlari har jabhada ilg‘or, tashabbuskor, ibratlidir. O‘zining fidokorona mehnati, erishgan ulkan yutuqlari, davlat va jamoat ishlaridagi faol ishtiroki, ibratli fazilatlari bilan xalqimiz o‘rtasida obro‘-eʼtibor qozongan ko‘plab opa-singillarimizning nomlarini hurmat bilan tilga olamiz.

Jumladan, «Matyoqub Qodir» chorvachilik fermer xo‘jaligi texnologi - Bayramova Natalya Shamuratovna “Do‘stlik” ordeni bilan, Yaqubova Raʼno Abullayevna - “Moʻtabar ayol” ko‘krak nishoni bilan, Olloyorova Sevinchoy Farhod qizi - “Zulfiya” nomidagi Davlat mukofoti taqdirlandilar.

Mana shunday hurmatli ayollarimizning borligi xalqimizga yana-da faxr bag‘ishlaydi.

Munis onajonlar, mehribon opa-singillar!

Oilalarimizni, jamiyatimizni fayz-u baraka bilan nurafshon etib kelayotgan Siz latofatli ayollarni 8 mart – Xalqaro xotin-qizlar kuni bilan yana bir bor muborakbod etib, qalbimdagi eng ezgu niyatlarni tilayman.